A última proba antes de poñer rumbo a Madrid.
O campo de fútbol de As Corticeiras, en Caldas de Reis, será testemuña da última sesión de adestramento da Selección Galega UEFA antes de poñer rumbo á capital de España. O seleccionador Iván Cancela realizará a última proba antes de dar a coñecer a lista dos 18 futbolistas que o martes día 11 desprazaranse a Madrid para a gran cita que terá lugar 24 horas máis tarde ante o País Vasco na Cidade do Fútbol de Las Rozas.
O combinado autonómico xogarase o pase á gran final da Copa das Rexións UEFA ante a formación vasca nunha eliminatoria a partido único o mércores 12 de febreiro ás 10.30 horas. Cómpre salientar que os nosos chegan a esta Fase Intermedia despois de asinar o billete dun xeito extraordinario nas Rías Baixas ante Ceuta e Castela A Mancha o pasado mes de decembro.
Convocatoria definitiva
Tras o adestramento do martes en Caldas, o seleccionador galego dará a coñecer a convocatoria definitiva dos 18 que defenderán a camisola de Galicia ante o País Vasco. A expedición galega ten previsto poñer rumbo á capital de España o martes día 11 pola mañá e realizar a última sesión de adestramento xa en Las Rozas esa mesma tarde.